唔係呀嗎?!

今朝同蕃茄講起，兩個月前意粉國30-40度，兩個月後既今日係1.6度至15.8度。預料聽日係0度-13度。
除咗突然其來既天氣轉變外，噚日睇新聞時，亦都比咗個更意外既消息，就係政府建議退休年齡延遲到男性係70歲，女性係65歲。
攪到小Nel今日即刻要出關講兩句！一早都預咗自己未必可以60歲係意粉國攞退休金嫁啦，因為政府要求要做滿30年先可以攞。但係依家更加唔使指意啦！
好多人講外國有退休金，又有醫療保障，福利又好，比起香港百冇好好多。 我好想講，事實係啱啱相反！因為香港稅率底，市民出糧可以自己安排蓄錢定使錢，但係呢度係未出糧已經比政府收咗三成，未見官先打三十大板！所淨冇幾，好多人連生活所需都成問題，更加唔使諗蓄錢啦!
我有好多同事，每月扣除稅收，只得800蚊歐羅落袋，租間房去咗三舊，買舊芝士都要兩蚊歐羅，八月放假由意北去意南都要使600蚊歐羅，超過一半既意粉都冇passport, 更加唔好問有冇搭過飛機。
係呢度，間唔中都會聽到有人臨近退休,  有人直情係聽日退休今日死，兩腳一呻，都未嘆過就玩完！ 供咗咁多年會，到頭嚟咩都冇！遺孀攞6成退休金叫做好過冇！
講醫療，只包眕金唔包藥費，小Nel未做嘢前去醫院檢查，佢哋話蕃茄有做嘢所以我要比錢，到有工開，自己交稅，一樣要比錢！
小Nel平時好少同蕃茄談論呢度既政制，因為真係唔熟悉，但係噚日我只係見到個標題，已經無名火起三千丈！就算我冇份享都要彈吓！
啲人都冇腦嫁！係！ 係節流嚟講，政府呢一刻係可以大條道理唔派錢比啲臨近退休既人，但係就整個國家既經濟嚟講，絕對係百害而無一利！
對班臨近退休人仕 - 仲要坐多幾年，頭腦當然唔夠後生仔咁有諗頭，咁有衝勁, 做到咁上下，人工當然高過啲後生，每日只等放工，等weekend，豪無衝勁，死水一潭， 開會總阻住個地球轉。
對班後生仔 - 見冇位上，出邊失業率又高，唯有同班老嘢一齊等放工happy hour, 等8月，等聖誕。整個社會基本上了無生氣，簡直係浪費上帝比佢哋既生命！
對公司 - 開源唔到(因為只靠食老底) 又唔可以節流下，咪唯有摺埋囉！
對政府 -  多咗失業率, 政府要派失業金，雖然係羊毛出自羊身上 (我啲班仲有嘢做既苦主！) 但係都係一個唔健康既局面。
小Nel好多時係火車度見到啲後生仔女Gel晒頭嚟掃垃圾，讀咗咁多年書，只係搵到份掃垃圾，我睇佢可悲，但佢已經覺得好過冇。
咪睇啲意粉咁鍾意係電視度鬧交，係火車度咁滔滔不絕發表偉論，就以後佢哋好醒，就好識得選總理。
都唔知係個貝盧思科灌佢哋飲迷湯定係佢哋只係得把口鬧人，任佢哋普選都選條咁既喊蟲。 啲選民一心以為佢咁有錢 (蕃茄叫佢做李嘉誠)，一定可以幫到意粉國既經濟， 係佢係幫到，不過只係幫自己呀嗎！
我同蕃茄講，梁錦松買車事件一出即刻Bye Bye! 所有政府官員卸任後必須過冷河先可以去私營機構做嘢，以防洩露政府消息。 蕃茄都同意，我話咁選條喊蟲既時間都知嫁啦，啲人仲信佢?! 意粉就係咁嫁啦！ 得把口，做官既識鬧人但係自己又唔夠號召力，咪唯有繼續比人灌迷湯囉！ 你話激死人冇！
好似香港既海底隧道咁，成日都話要加價嚟減低塞車， 唔知意粉政府遲啲會唔會話要一百歲先可以攞退休金呢?
我都開始要考慮返香港退休好啲，起碼唔使洗歐羅呀！