賴嘢!

自從醉心於整首飾後，巧奈都冇用心咁煮飯，菜式嚟嚟去去都係喎幾味！諗住趁老細未投訴之前好番埋位做嘢啦！
正所謂食嘢唔做嘢，做嘢就打爛嘢！一行Bid就出事啦！
話說近排行超市，見到以下呢兩樣蔬菜，都出咗一排見依然有得賣即係可以啦! 咁就賴嘢啦！
佢叫"Scorza Amara Disoncino" Amara意文即係苦咁解，我睇都冇睇就買!!!真係抵打！我買佢既原因係我覺得佢似牛蒡，我係香港都未食過牛蒡，但係見到好興同埋講到好多好處，咁咪買囉！

點知我切咗少少試入口就苦到不得了！我上網查，佢係冇中或英文名既，網上有人討論過佢哋話好似紅蘿蔔咁煮就得啦！呢度既甘筍係甜到以為落咗糖既，點比呀！
買咗冇理由就咁就丟入垃圾桶，咁我就先切絲用鹽水浸過後，落糖同醋煮，又真係可以去晒苦噃！
食咗先知，原來呢隻係廁所靈藥！大約一個鐘就見效，唔會肚痛，唔會聽到腸聲，但係就超清腸胃！

二號佳麗，芳名 "Insalata Belga" 貌似香港既娃娃菜，咪以為係迷你版黃芽白！
我冇試就煮，諗住煮雞柳，點知炒好晒成碟先知，原來佢係苦嫁！頂！我都唔知點食啦！

意粉人好奇怪，佢哋有好多蔬菜係苦苦地但係好多人食，例如以上既係用嚟做沙律，加醋食。
以下呢位佳麗 Cavolo Viola - 紫椰菜，外表靚爆，其實都係苦既，又係要嚟做沙律多！

順帶一提, 呢度係有紫色西蘭花,不過唔常見! 係咪巧靚呢， 有人用嚟煮湯，真係靚爆呀！

講開中招，有次我初嚟步到見到有紫色既薯仔就以為係蕃薯，點知原來同黃色薯仔只係顏色唔同，吹脹！