踏出意大利之瑞士半天遊 (中集)

睇完瑞士既景色(其實係睇樓!) 跟住帶各位團友去睇吓其他得意又特別既嘢!
話說我哋一行四人, 到瑞士既時候都差唔多中午時份.
街道好整潔, 感覺好似好過係意大利

好正常咁, 梗係搵地方醫肚啦! 沿途見到餐廳上既菜牌好吸引,當仲係度發緊白日夢, 流晒口水諗住試吓邊道當地菜既時候......
四個人當中, 得蕃茄同Guiseppe係有收入既人仕,
我哋啲無業遊民, 梗係要聽老細話啦! 兩位老細就好好數口咁, 即刻周圍搵銀行或者上Nevigator去check瑞士法郎同歐元對換率.
嘩! 對於香港人嚟計, 使歐羅已經夠攞命啦! 點知一對之下, 瑞士法郎仲厲害!
計數機既答案, 已經好明確咁話比我哋知餐廳既名稱為"麥記"!

冇計啦! 依家仲係無業遊民唯有聽晒佢哋話啦! 下次出國, 假如我已經有工開, 我就可以最少攞返一次話事權啦!
我同蕃茄今年除夕會去巴黎探羊生羊太, 希望到時我已經擁有話事權啦!
(仲發緊夢, 唔知幾時呢?)
去過唔同國家旅行既大家, 如果有去"麥記"開過餐, 都知道佢哋會因應唔同種族文化,而作出相應既配合!
有朋友去過芬蘭, 話係"麥記"食過三文魚漢堡包喎! 嘩! 諗起都流口水呀!
嚟到瑞士"麥記", 比大鄉里小Nel發現新大陸! 登登! 就係呢個液體棄置筒啦!
筒上面用嚟裝飾既朱古力奶, 示意比顧客知, 飲淨既飲品, 可以倒入呢個筒內.
以我所見, 瑞士人既品德敎育做得唔錯! 大部份顧客都好主動同樂意去執拾返餐盤.

除咗呢樣特別之外, 小Nel仲發現, 餐廳入面有百貨公司入面咁大部既PS2, 同滑梯比小朋友玩!
哈! 唔知原意係想留住小朋友既心, 定係方便啲家長可以慢慢傾呢?
喎期食"麥記餐"送可樂玻璃杯, 有紫色, 草綠色, 藍色, 粉紅色, 黃色同深藍色.
啱啱喎日係送草綠色, 依家小Nel日日都飲可樂水! 仲可以知道自己飲咗幾多鑵可樂!

下圖係瑞士同意大利邊境既村落, 睇吓! 雖然唔係大城市, 但係都好城市化!

蕃茄行過超市, 想入去睇吓有咩手信可以買.
比我發現到呢種鋁鑵做既樽裝可樂!

旅程未完嫁! 請繼續收睇啦!