老爺生日，我哋去咗呢間餐廳食晏！又係多多多碟！
呢間餐廳同我哋食開既有啲唔同，雖然都係長menù, 但係份量少好多，碟頭似法國菜多，同埋佢哋用料特別，唔似一般Piemonte既菜式！唔好講咁多啦，睇片啦！
餐廳既格局唔錯，細細地不過好舒服！
細餐廳，侍應得一個，可能係老板娘添！佢好好人，好細心，佢有留意到我唔食得麵包，特登同我講，啲黑橄欖麵包用天然發粉做，我真係想錫佢一啖！
我哋叫咗一支紅酒，一支白酒，呢支紅酒14°，我聞多過飲，因為真係好正，淨係聞都可以醉啦！
又係嘉芙蓮最愛既生牛肉，不過加咗黑松露菌，都幾落本！
第二碟因為加咗牛奶去整我冇份，係劍魚Mousse上面係紅蘿蔔Mousse!
呢個雖然係沙律，但係佢哋用白醋滾起燈籠椒，爽得嚟好夠味！好醒胃！
呢個有芝士，我又冇份！係芝士露荀酥皮批，啲芝士勁到我想出去行個圈先！
呢個係蔬菜千層，當然我冇食啦！但係創意滿分，咁樣健康好多！
我呢個蔬菜闊麵，我諗可能係佢哋自家製，因為超薄！讚！
到主菜！我點咗女侍應特別推介既西班牙豬柳，唔講既話以為係牛，因為一啲都唔硬！又讚！
呢碟係Barolo紅酒汁牛柳，超好味呀！我都忍唔住用麵包去索埋啲汁！正！
好啦！到甜品, 我叫咗個自家製浸桃！連皮浸，食到皮既鞋，不過好爽！好清同香甜！
唔記得係咩甜品，不過都應該唔錯！
食飽飽，出去行吓！餐廳出面有個超大露台！ 開酒會會唔錯！
望出去全部係葡萄田! Piemonte 既酒點解咁出名，睇地形就知啦！
因為周圍都係大大小小既山坡，葡萄可以充分咁吸收陽光！
有棵車厘子樹，點解車厘子賣到咁貴呢?
原因係通常樹身會生到成兩層樓咁高，要用手擇，其實幾危險嫁！
沿途返屋企，見到葡萄田一遍綠油油，忍唔住落車影返兩幅！
某啲葡萄前面會種唔同種既玫瑰，種出嚟會有唔同既味道嫁！
下期預告！汽車博物館，連對車冇研究既小Nel都忍唔住狂影！密切留意啦！
沒有留言:
發佈留言