福建炒飯

之前水晶晶落單叫小Nel寫福建炒飯, 可能嚟意大利奈咗, 學埋佢哋啲慢吞吞, 依家先上菜, 真係唔好意思!
好啦! 依家上菜啦!

其實小Nel 煮呢個飯之前, 真係冇研究過正宗福建炒飯係點煮嫁!
只不過係憑我食過既想像出嚟嫁咋! 千忻唔好話我呃鬼佬同你哋呀!
以下係我上網係維基百科度見到既資料: -
福建炒飯常見於香港，在福建卻沒有這種濕炒飯。福建炒飯材料有草菇、西芹、瑤柱絲、燒鴨絲、雞肉粒、蝦仁及粟米粒。芡汁材料有雞湯、生粉、生抽、老抽及蠔油。做法是先炒蛋炒飯，後材料及芡汁一起炒，再澆於蛋炒飯上。
不過小Nel既版本係: -
材料有 - 雞蛋 (炒飯底用)  蝦仁 西芹 或脆肉瓜 冬菇 雞肉粒 雞粉 蠔油 蒜頭
做法- 先煲飯, 最好過夜, 等水份收乾以便炒時飯粒分開
如果功夫了得既Blogger, 不妨加蛋汁上飯面炒, 做成蛋包住一粒粒既飯
但係超懶既小Nel 就鍾意雞蛋分開炒, 一嚟唔使怕收乾水既飯因為蛋汁而再次結舊, 二嚟又可以食到同睇到實質既蛋, 實行整色整水!
將飯底同蛋一起炒,然後加雞粉同鹽, 上碟.
P.S.: 小Nel係蕃茄媽度偷師, 學咗一度炒蛋絕招! 唔好笑! 真係幾好用嫁!
1. 發唔發蛋都唔緊要. 先落少許油, 然後倒入蛋汁, 開大火, 用鑊鏟順時針不停咁轉.
2. 轉到一半, 就會好似麥當當早晨全餐既炒蛋咁, 好靚!

3. 再繼續轉至全熟, 啲蛋就會自自然然變成蛋粒, 唔使用鑊鏟切粒, 好方便嫁!

然後加雞粉同鹽, 將蛋同飯底炒好上碟.
飯面既餸做法如下-
洗乾淨冬菇後加水浸軟冬菇, 浸軟後切粒, 浸冬菇水唔好倒走, 加蠔油, 少許糖, 生粉作芡汁備用.
雞肉切粒, 加糖, 生抽, 豆粉, 少許油備用
西芹 或脆肉瓜切粒備用
先爆香蒜頭, 落雞肉煮至7成熟, 加入西芹 或脆肉瓜一起炒, 再落冬菇炒至西芹 或脆肉瓜熟, 再落冬菇芡汁
當芡汁開始杰身再加入蝦仁炒一分鐘, 熄火, 放上炒飯面即成!
因為啲鬼佬食慣廣東炒飯多顏色而小Nel 又要煮啲佢哋未試過既菜佢哋食, 咪試吓煮福建炒飯囉!
呢! 嚟緊6月20號, 我又煮亞洲菜大鑊飯啦! Come mai? 聽到仲即刻主動話嚟幫手! 真係好姊妹啦!