Festa di Alpini 阿爾卑斯山地部隊意大利軍團節 (1)

一連三日(6/5-8/5)係都靈Torino舉行阿爾卑斯山地部隊的意軍節，呢個軍團係一個專業的山區步兵，接受高山雪地區地形部隊訓練, 專門針對人跡罕至的山區。

成立於 1872年，係世界上最早既高山活動步兵軍，原本為了保護意大利北部山區的邊界與法國，奧地利和瑞士。制服特點係帽上有羽毛!

好啦！講解完就立即投入呢個節日啦！話說係海陸空山呢幾個部隊中，山軍係最多軍歌，最鍾意玩既！唯獨佢哋每年都有山軍組織活動，係意粉國唔同既地方舉行， 通常都唔止一日，開頭通常會狂歡，之後喎日巡遊！

狂歡 - 例如今次就星期五同六，就成個都靈市中心 (面積有油尖旺咁大) 封晒做行人專用區，所有公共交通工具，免費乘搭，仲有白夜Notte Bianche (即係所有店舖可以晚上繼續營業)。

市政府唔使安排任何節目比佢哋嫁！只要發牌比人周街賣酒同食物就得，成個市中心交晒比佢哋就自己攪掂啦！

周圍都係酒精同音樂，隨便係馬路中心唱歌，大把人附和！成晚聽得最多係國歌！

為咗比大家更易投入，小Nel搵到一段片，睇完就明啲人玩到幾癲！

飲咗兩日，到星期日晚要朝日8點巡遊，蕃茄話到時個個行到S形！

 

下篇比相你哋睇！